الدنيا جامعة مفتوحة موال
الدنيا جامعة مفتوحة
يتعلم فيها ومنها كل الناس
حقوق واداب وسياسة
ووحى من السما ووسواس خناس
كل العلوم فى دروبها
واللى يمد ايدة يتعلم ويزيد احساس
فيها الاصيل يتعلم
ويزيد اصالة ومحبة لكل الناس
فيها الخسيس يتباهى بخستة
وماعندهوش احساس
بين دروبها تتعلم
وتقابل كل صنوف الناس
ناس معدنها ذهب
سعرة كل يوم يزيد ويحبة كل الناس
وناس نحاس بيلمع
وقلوبها سودة مليانة بكرة الناس
وناس حديد سعرة يوم فى السما
ويوم يصدى وبالنعال ينداس
وناس قلوبها ياقوت
ومرجان وتلمع زى الماس
وناس تقدر الطيب
وتشيلة على الكتاف والراس
وناس ماليها فى الطيب
ولافى الخير ولاعندها احساس
وناس عشان تعيش
تدوس على رقاب الناس
وناس ايدها ممدودة بالخير
وخيرها يكفى كل الناس
وناس الدنيا وخداها
حتى عن عبادة رب الناس
الدنيا جامعة مفتوحة
يتعلم فيها كل الناس
حقوق واداب وسياسة
ووحى من السما ووسواس خناس
عصام على عبد الرحيم
ليست هناك تعليقات:
إرسال تعليق