اصحى وسبّح رب البرية
مشيت ارتّل وأنشد وأجوّد
وصوتى يجرى بين النواصى
هنا بانقّر.. هنا باعود
هنا باحودّ عن المعاصى
لو كنت بحرى
لازم أقبّل
وإن كنت قبلى.. لازم أبحّر
ولحد آخر نفس ف صدرى
هاشد قلبى وتر واسحّر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبّح رب البرية..
مسحراتى شايف
البركة ف السحور
وباوّزع القطايف
اصحى لى يا عم نور
ولا انت لسة خايف
من زحمة المرور
إن كنت خلاص مصدع
من زعقة الكلاكس
حاسب بعدين تودع
وأنت بتستنى تاكس
عايز تشوف خطيبتك
كفاية عليكو فاكس
ولحد يوم زفافك
ترتاح من الشرور
أتوبيسنا ضخم جداً
لكن طيّب لطيف
تستناه ع المحطة
يطلع لك ع الرصيف
بينط من الكبارى
- والمصحف الشريف -
بينط ويستحمى
ف النهر.. وف البحور
أما عجيبة العجايب
لما بيتكتكونا
ناخد م الزق نايب
ساعة ما يكركبونا
والتوك توك نفسه وزنه
أخف من زبونة
تقعد على حرف واحد
ويهاجمك الناصور
والقطر اللى ف بلدنا
كائن عجيب غريب
ما بيكتفيش بإنه
يخرج عن القضيب
ممكن يخش بيتك
وسيادتك والنصيب
يا تكون بين الضحايا
يا تقطع الأمور
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يارب
المصرى بنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يارب
جمال بخيت
ليست هناك تعليقات:
إرسال تعليق